روس: جنگ کے خلاف احتجاج کرنے والے سینکڑوں مظاہرین گرفتار
روس کی پولیس نے سینٹ پیٹرزبرگ میں احتجاج کرنے والے سینکڑوں مظاہرین کو حراست میں لے لیا ہے۔
لگ بھگ ایک ہزارافراد یوکرین پر حملے کے خلاف احتجاج کر رہے تھے کہ اس دوران ماسک پہنے پولیس اہلکاروں نے انہیں احتجاج سے روک دیا۔ پولیس نے 100 سے زیادہ مظاہرین کو حراست میں لے لیا ہے۔
یوکرین میں پھنسے پاکستانی طلبہ کی آواز سننے والا کوئی ہے: مریم نواز
پاکستان میں حزبِ اختلاف کی جماعت پاکستان مسلم لیگ ن کی نائب صدر مریم نواز نے سوال اٹھایا ہے کہ یوکرین میں پھنسے سینکڑوں پاکستانی طلبہ کو سننے والا کوئی ہے جو وہاں سے نکلنے کا انتظار کر رہے ہیں۔
روسی افواج کی یوکرین کے دارالحکومت کیف کی جانب پیش قدمی
روس کی بری افواج نے یوکرین کے دارالحکومت کیف کی جانب سے پیش قدمی شروع کر دی ہے۔ دوسری جانب یوکرین کے صدر ولادیمیر زیلنسکی نے مغربی ملکوں سے مدد کی اپیل کی ہے۔
یوکرین کے صدر کا کہنا ہے کہ روس کو جارحیت سے روکنے پر اس پر اب تک عائد کی جانے والی پابندیاں ناکافی ہیں۔
خبر رساں ادارے 'رائٹرز' کے مطابق یوکرین کے حکام نے کہا ہے کہ روس کی افواج دارالحکومت کیف کے مضافات کے قریب ہیں جب کہ یوکرین کی افواج چار مختلف مقامات پر دفاعی پوزیشن پر موجود ہیں۔
روس کا یوکرین پر حملہ اقوامِ متحدہ کے متفقہ چارٹر کی خلاف ورزی ہے، گوتریس
اقوامِ متحدہ کے سیکریٹری جنرل انتونیو گوتریس نے روس کے صدر ولادیمر پوٹن سے یوکرین پر حملہ روکنے اور اپنی فوج واپس بلانے کی اپیل کی ہے۔
اقوامِ متحدہ کے ہیڈکوارٹرز میں صحافیوں سےبات کرتے ہوئے ان کا کہنا تھا کہ آنے والے دنوں کے فیصلے ہماری دنیا کی تشکیل کریں گے اور ان پر کروڑوں انسانوں کی زندگی کا دارومدار ہوگا۔
ان کا کہنا تھا کہ کسی ملک کا دوسرے کے خلاف طاقت کا استعمال اقوامِ متحدہ کے متفقہ چارٹر کی خلاف ورزی ہے۔
انہوں نے کہا کہ روس کا حملہ اقوامِ متحدہ کے چارٹر کے خلاف اور ناقابلِ قبول ہے۔ لیکن یہ اقدام ناقابلِ واپسی نہیں ہے۔