رسائی کے لنکس

میامی سانحہ: ملبے سے مزید 10 نعشیں برآمد، تعداد 46 ہو گئی، درجنوں کی تلاش 14ویں روز بھی جاری


12 منزلہ عمارت کے ملبے کے قریب سے دو ریسکیو ورکر گزر رہے ہیں۔ 6 جولائی 2021
12 منزلہ عمارت کے ملبے کے قریب سے دو ریسکیو ورکر گزر رہے ہیں۔ 6 جولائی 2021

امریکی ریاست فلوریڈا کے تفریحی شہر میامی کے ساحل پر چودہ روز قبل زمین بوس ہونے والی 12 منزلہ رہائشی عمارت کے ملبے میں دبے افراد کی تلاش اب بھی جاری ہے۔ مزید نعشیں ملنے کے بعد ہلاک ہونے والوں کی تعداد بڑھ کر 46 ہوگئی ہے جب کہ درجنوں افراد اب بھی لاپتا ہیں۔

میامی ڈیڈ کے اسسٹنٹ فائر چیف ریڈے جیڈالا نے بدھ کے روز متاثرہ افراد کے خاندانوں کو ایک پرائیویٹ بریفنگ میں بتایا کہ ملبے میں سے مزید دس افراد کی باقیات نکال لی گئی ہیں جب کہ اب بھی کئی افراد ملبے میں دفن ہیں، جس سے ہلاکتوں کی تعداد میں اضافہ ہو گا۔

ان کا کہنا تھا کہ کارکنوں نے ملبہ ہٹانے میں نمایاں کامیابی حاصل کی ہے اور وہ گہرائی میں جا کر تلاش کرنے کے قابل ہو گئے ہیں۔

منگل کے روز کارکنوں نے میامی کے سرف سائیڈ علاقے کے چیمپلین ٹاور کا کنکریٹ کا ملبہ ہٹا کر مزید نیچے جانے کا راستہ بنایا۔

ریسکیو ورکز منہدم عمارت کا ملبہ ہٹا کر لاپتا افراد کو تلاش کر رہے ہیں۔ 3 جولائی 2021
ریسکیو ورکز منہدم عمارت کا ملبہ ہٹا کر لاپتا افراد کو تلاش کر رہے ہیں۔ 3 جولائی 2021

منگل کے روز میامی ڈیڈ کاؤنٹی فائر ریسکیو ڈیپارٹمنٹ نے ایک ویڈیو جاری کی جس میں ریسکیو ورکز کو کھدائی کرتے اور لاپتا افراد کو ڈھونڈتے ہوئے دکھایا گیا تھا۔ منگل کو 8 افراد کی باقیات ملیں تھیں جو کسی ایک دن میں ملنے والی سب سے زیادہ تعداد تھی۔

اسی دوران فلوریڈا کے ساحل سے سمندری طوفان ٹکرانے سے علاقے میں تیز ہوائیں اور بارش شروع ہو گئی جس سے امدادی سرگرمیوں میں رکاوٹیں پیش آئیں۔

ریسکیو ورکز کو ابھی تک کسی کے زندہ بچ جانے کی کوئی علامت نہیں ملی۔ تاہم، عہدے داروں کا کہنا ہے کہ ہو سکتا ہے کہ عمارت کے ملبے میں کوئی ایسی کھلی جگہ بن گئی ہو جہاں کچھ افراد نے پناہ لے رکھی ہو اور وہ زندہ ہوں۔

کاؤنٹی کے پولیس ڈائریکٹر فریڈی ریمرز نے منگل کی شام ایک نیوز کانفرنس میں بتایا کہ اس وقت ہمارا اولین مقصد متاثرہ خاندانوں کی ہر ممکن مدد کرنا ہے۔

گری ہوئی عمارت کے قریب ایک باڑ پر متاثرہ خاندانوں نے اپنے لاپتا افراد کی تصویریں لگا دیں ہیں۔ 6 جولائی 2021
گری ہوئی عمارت کے قریب ایک باڑ پر متاثرہ خاندانوں نے اپنے لاپتا افراد کی تصویریں لگا دیں ہیں۔ 6 جولائی 2021

24 جون کی صبح جب عمارت کا ایک حصہ زمین بوس ہوا تھا، اس کے ایک گھنٹے کے بعد سے ملبے کے اندر سے کوئی بھی زندہ شخص نہیں ملا۔

یہ سانحہ الصبح اس وقت پیش آیا جب لوگ اپنے اپارٹمنٹس میں سو رہے تھے۔

فائر چیف ایلن کومنسکی کا کہنا ہے کہ بدقسمتی سے ایسے آثار موجود نہیں ہیں کہ ملبے میں اب کوئی زندہ شخص بھی موجود ہو گا۔

میامی ڈیڈ کی میئر ڈینیلا لیون کاوا نے کہا ہے کہ لاپتا ہونے والے افراد کے خاندان دکھ بھری خبر سننے کے لیے تیار ہیں۔ ان کا کہنا تھا کہ گزشتہ ہفتے صدر جو بائیڈن نے حادثے کی جگہ کا دورہ کر کے مدد کا وعدہ کیا تھا۔

اس تصویر میں منہدم ہونے جانے والی عمارت کا بقیہ آدھا حصہ دکھائی دے رہا ہے جسے بعد میں بارود سے گرا دیا گیا تھا۔2 جولائی 2021
اس تصویر میں منہدم ہونے جانے والی عمارت کا بقیہ آدھا حصہ دکھائی دے رہا ہے جسے بعد میں بارود سے گرا دیا گیا تھا۔2 جولائی 2021

منگل کے روز نامہ نگاروں کو عمارت کو قریب سے جا کر دیکھنے کا موقع ملا۔ تاہم یہ رسائی صرف اس حصے تک تھی جہاں ریسکیو ورکر کام کر رہے تھے۔

منگل کو سمندری طوفان ایلسا کی تیز ہواؤں، گرج چمک اور بارش نے ریسکیو ورکز کے کام میں خلل ڈالا۔ اسسٹنٹ فائر چیف ریڈے جیڈالا نے بتایا کہ ہواؤں کی رفتار 32 کلومیٹر فی گھنٹہ تھی اور اس کے ساتھ تیز جھکڑ چل رہے تھے، جس کی وجہ سے بھاری ملبہ اٹھانے کی کوششوں میں رکاوٹیں پیش آئیں۔

فائر چیف کومنسکی نے کہا ہے کہ ریسکیو ورکز اب تک 124 ٹن ملبہ ہٹا چکے ہیں جسے ایک گودام میں محفوظ کر دیا گیا ہے، جسے عمارت گرنے کی وجوہ جاننے کی تحقیقات میں ثبوت کے طور پر استعمال کیا جا سکے گا۔

سمندری طوفان ایلسا کے ساتھ آنے والی تیز ہواؤں اور بارشوں سے امدادی سرگرمیوں میں خلل پڑا۔ 6 جولائی 2021
سمندری طوفان ایلسا کے ساتھ آنے والی تیز ہواؤں اور بارشوں سے امدادی سرگرمیوں میں خلل پڑا۔ 6 جولائی 2021

عمارت کا آدھا حصہ گرنے کے بعد باقی ماندہ عمارت اتنی کمزور ہو گئی تھی کہ کسی بھی لمحے اس کے گرنے کا خطرہ لاحق تھا جس کی وجہ سے امدادی سرگرمیوں میں بھی دشواری پیش آ رہی تھی۔ اس صورت حال پر قابو پانے کے لیے ہفتے اور اتوار کی درمیانی رات کو باقی ماندہ عمارت کو بھی بارود سے گرا دیا گیا۔ عمارت گرنے کا خطرہ ٹل جانے کے بعد امدادی کاموں میں تیزی آئی ہے اور ملبے میں دفن افراد کی باقیات کو ڈھونڈ کر نکالا جا رہا ہے۔

XS
SM
MD
LG