رسائی کے لنکس

logo-print

امریکی کے اسکول میں ہونے والی فائرنگ میں دو طالب علم ہلاک


امریکی کے اسکول میں ہونے والی فائرنگ میں دو طالب علم ہلاک

فائرنگ کے واقعہ میں ایک اور طالب علم زخموں کی تاب نہ لاتے ہوئے ہلاک ہوگیا ہے۔ جس کے بعد ہلاک ہونے والوں کی تعداد دو ہوگئی ہے۔

کارڈن شہر کے پولیس چیف نے کہا ہے کہ 17 سالہ طالب علم رسل کنگ منگل کی صبح ہلاک ہوا۔

پیر کی صبح ایک طالب علم نے کارڈن اسکول کے کیفے ٹیریا میں فائرنگ شروع کردی تھی۔جس سے کئی طالب علم زخمی ہوگئے تھے۔

ایک 16 سالہ طالب علم گولیاں لگنے کے کئی گھنٹے بعد ہلاک ہوگیاتھا۔ جب کہ زخمی ہونے والے تین اور طالب علم اسپتال میں زیر علاج ہیں۔

حکام نے کہاہے کہ انہوں نے پیر کی سہ پہر فائرنگ کے سلسلے میں ایک مشتبہ نوجوان کو حراست میں لے لیا ہے۔ عینی شاہدوں اور مقامی خبروں کے مطابق گرفتار کیے جانے والے نوجوان کانام ٹی جے لین ہے۔ وہ ایک قریبی اسکول کا طالب علم ہے۔

مشتبہ نوجوان کو منگل کے روز عدالت میں ابتدائی سماعت کے لیے پیش کیا جارہاہے۔ حکام کا کہناہے کہ حملے کی وجہ تاحال واضح نہیں ہوسکی۔

لین کے وکیل نے پیر کو دیرگئے مقامی میڈیا کو بتایا کہ اس کے موکل کا خاندان فائرنگ کے واقعہ پر بہت غم زدہ ہے اور اس نے متاثرہ خاندانوں سے تعزیت کا اظہار کیاہے۔

وکیل کا کہناہے اس کی معلومات کے مطابق لین ایک خاموش طبع اور اچھا لڑکا ہے اور اس نےکبھی کسی کے لیے مسائل پیدا نہیں کیے۔

تقریباً پانچ ہزار افراد پر مشتمل قصبے کا اسکول منگل کے روز بند رہا۔

حکام کا کہناہے کہ ان کی تفتیشی کارروائی جاری ہے۔

XS
SM
MD
LG