پاکستان میں حزب اختلاف کی سب سے بڑی جماعت مسلم لیگ (ن) کے مرکزی رہنما اور پنجاب اسمبلی میں اپوزیشن لیڈر حمزہ شہباز بھی جیل میں کرونا وائرس کا شکار ہو گئے ہیں۔
مسلم لیگ (ن) کے ڈپٹی سیکریٹری جنرل عطا اللہ تارڑ نے ایک ٹوئٹ میں بتایا کہ حمزہ شہباز کو چند روز سے بخار تھا جس کے بعد اُن میں وائرس کی تصدیق ہوئی ہے۔
عطا اللہ تارڑ کا کہنا ہے کہ حمزہ شہباز کو فوری طبی امداد کے لیے کوٹ لکھپت جیل سے اسپتال منتقل کرنا ضروری ہے۔
Have written to the Authorities to shift Hamza Shehbaz sb to Ittefaq Hospital immediately where his physician Dr Rizwan can have access to him and administer medical treatment. He%27s been unwell since a week. NAB prisoners languish in prisons without any investigation or evidence pic.twitter.com/rydaC0pvZu
— Attaullah Tarar (@TararAttaullah) September 13, 2020
عطا اللہ تارڑ کا کہنا ہے کہ پنجاب حکومت کو باضابطہ طور پر درخواست دی گئی ہے کہ حمزہ شہباز کو اتفاق اسپتال منتقل کر دیا جائے جہاں ڈاکٹرز اُن کا طبی معائنہ کریں گے۔
مسلم لیگ (ن) کے صدر اور قومی اسمبلی میں قائد حزب اختلاف شہباز شریف نے بھی اپنے صاحبزادے کی صحت پر تشویش کا اظہار کرتے ہوئے کہا کہ "میرے بیٹے کو جیل میں کرونا ہو گیا۔ پہلے اس نے مشرف آمریت کا سامنا کیا اب وہ نیب، نیازی گٹھ جوڑ کا مقابلہ کر رہا ہے۔"
میرے بیٹے حمزہ کو جیل میں کورونا ہوگیا ہے۔ مشرف دور میں نیب مقدمات کا ڈٹ کر مقابلہ کرنے کے بعد وہ اب نیب نیازی گٹھ جوڑ کے سیاسی انتقام کا انتہائی جراتمندی و ثابت قدمی سے سامنا کر رہا ہے۔ میری آپ سب سے درخواست ہے کہ حمزہ کی جلد صحتیابی کے لئے خصوصی دعا فرمائیں۔ جزاک اللہ خیر۔
— Shehbaz Sharif (@CMShehbaz) September 13, 2020
مسلم لیگ (ن) کی نائب صدر مریم نواز نے بھی حمزہ شہباز کی صحت کے حوالے سے تشویش کا اظہار کیا ہے۔
مریم نواز نے اپنی ٹوئٹ میں کہا کہ حمزہ شہباز گزشتہ ڈیڑھ سال سے ایک جھوٹے مقدمے میں جیل میں ہیں۔
مریم نواز نے سوال اُٹھایا کہ جیل میں قید تنہا شخص کو کرونا کیسے ہو گیا؟
ابھی تو یہ تحقیق ہونا باقی کہ گھر کا کھانا بند کر کے نواز شریف کو NAB میں کیاخوراک دی جاتی رہی کہ یکا یک ان کی بیماری میں شدت آگئی، ان کے پلیٹلٹس خطرناک حد تک گر گئے اور انہیں ہارٹ اٹیک ہوا۔ سوال تو یہ بھی ہے کہ کال کوٹھڑی میں بند تنہا قیدی کرونا وائرس کی زد میں کیسے آگیا ؟
— Maryam Nawaz Sharif (@MaryamNSharif) September 13, 2020
حمزہ شہباز سے قبل اُن کے والد شہباز شریف میں بھی کرونا وبا کے عروج کے دوران وائرس کی تصدیق ہوئی تھی۔
وزیر اعظم پاکستان کے مشیر برائے احتساب شہزاد اکبر نے شہباز شریف کی ٹوئٹ پر ردعمل دیتے ہوئے کہا کہ "آپ کے صاحبزادے کسی سیاسی جرم میں نہیں بلکہ اربوں روپوں کی منی لانڈرنگ اور سرکاری ٹھیکوں میں کمیشن لینے کے الزام میں بند ہیں۔"
چاچو صاحبزادے کوئی سیاسی جرم میں نہیں اربوں کی منی لانڈرنگ اور اپنی جماعت کے لوگوں اور سرکاری ٹھیکوں میں کمیشن لینے کے جرم میں بند ہیں اور انکی بیل ہائی کورٹ سے مسترد ہو چکی ہے،کیا آپ چاہتے ہیں آپکےبھائی کی طرح اسے بھی لندن بھیج دیں؟ باقی الللہ شفا دے @CMShehbaz https://t.co/VuB1tttaPJ
— Mirza Shahzad Akbar (@ShazadAkbar) September 13, 2020
پاکستان میں انسداد بدعنوانی کے ادارے، قومی احتساب بیورو (نیب) نے گزشتہ سال جون میں آمدن سے زائد اثاثہ جات اور منی لانڈرنگ کے الزامات کے تحت حمزہ شہباز کو گرفتار کیا تھا۔
خیال رہے کہ پاکستان میں کرونا وبا سے اب تک تین لاکھ سے زائد افراد متاثر جب کہ چھ ہزار سے زائد ہلاکتیں ہو چکی ہیں۔
حالیہ عرصے میں ملک میں وبا کا زور ٹوٹنے سے معمولات زندگی بتدریج بحال ہو رہے ہیں۔