امریکہ کی ریاست فلوریڈا میں ایک ہیلی کاپٹر سمندرمیں ساحل کے قریب گر کر تباہ ہو گیا ہے جس کے نتیجے میں دو افراد زخمی ہوئے جنہیں اسپتال منتقل کر دیا گیا ہے۔
رپورٹس کے مطابق فلوریڈا کے شہر میامی میں محوِ پرواز ہیلی کاپٹر میں تین مسافر سوار تھے۔ حادثے میں اس میں سوار دو افراد زخمی ہوئے جب کہ تیسرا فرد محفوظ رہا۔
میامی کے ساحل پر تعینات پولیس کا کہنا ہے کہ اسے دوپہر ایک بج کر 10 منٹ پر ایک کال موصول ہوئی تھی۔
پولیس کا سوشل میڈیا پر بیان میں کہنا تھا کہ وہ میامی بیچ فائر اور دیگر ایجنسیوں کے ہمراہ موقع پر پہنچی۔وفاقی ایوی ایشین ایڈمنسٹریشن کے اہلکار بھی اطلاع ملنے کے بعد موقع پر پہنچ گئی تھی۔
This afternoon at 1:10 p.m., MBPD received a call of a helicopter crash in the ocean near 10 Street. Police and @MiamiBeachFire responded to the scene along with several partner agencies. Two occupants have been transported to Jackson Memorial Hospital in stable condition. 1/2 pic.twitter.com/heSIqnQtle
— Miami Beach Police (@MiamiBeachPD) February 19, 2022
سوشل میڈیا پر پوسٹ کی جانے والی ویڈیو میں دیکھا جا سکتا ہے کہ ہیلی کاپٹر سمندر میں گر رہا ہے جو ان لوگوں سے زیادہ دور نہیں جو کہ سمندر میں تیراکی کر رہے تھے یا کنارے پر موجود تھے۔
ایف اے اے کا بیان میں کہنا تھا کہ ہیلی کاپٹر کے تباہ ہونے کی وجوہات فی الحال معلوم نہیں ہیں۔ بیان میں مزید کہا گیا ہے کہ وہ نیشنل ٹرانسپورٹ سیفٹی بورڈ کے ساتھ مل کر حادثے کی تحقیقات کرے گا۔
امریکی محکمۂ ٹرانسپورٹ (ایف اے اے) کی سابق ڈائریکٹر جنرل میری شیاوو کا امریکی نشریاتی ادارے ‘سی این این’ سے گفتگو میں کہنا تھا کہ ویڈیو میں دیکھا جا سکتا ہے کہ ہیلی کاپٹر اپنے انجن کی طاقت کھو رہا تھا۔
Additional Information: There were three passengers onboard. Two were transported to the hospital.
— Miami Beach Police (@MiamiBeachPD) February 19, 2022
میری کا مزید کہنا تھا کہ اس سے دو باتیں ثابت ہوتی ہیں۔ ایک یہ کہ پائلٹ تربیت یافتہ تھا اور دوسرا پائلٹ ہیلی کاپٹر پر قابو رکھنے میں کامیاب رہا کیوں کہ ان کے بقول دیکھا یہ گیا ہے کہ جب انجن فیل ہو جائے تو اس کے علاوہ کوئی چارہ نہیں ہوتا کہ کنٹرول رکھتے ہوئے نیچے کی طرف جایا جائے۔
ان کا مزید کہنا تھا کہ یہ دیکھا جا سکتا ہے کہ پائلٹ ہیلی کاپٹر کے گرنے کے باوجود ساحل پر موجود لوگوں کو بچانے میں کامیاب رہا ۔