پاکستانی وزیر اعظم عمران خان نے کہا ہے کہ انہوں نے وزیر خارجہ شاہ محمود قریشی کو فوری طور پر ایران، سعودی عرب اور امریکہ کا دورہ کرنے کی ہدایت کی ہے، تاکہ وہ ان ممالک میں اپنے ہم منصبوں سے ملاقات کر کے علاقے میں جاری کشیدگی کو کم کرنے کی کوشش کریں۔
آج بدھ کے روز ایک ٹویٹ میں عمران خان نے کہا، ’’میں نے وزیر خارجہ شاہ محمود قریشی سے کہا ہے کہ وہ ایران، سعودی عرب اور امریکہ کا دورہ کریں اور ان ممالک کے وزرائے خارجہ سے ملاقات کریں۔ میں نے چیف آف آرمی سٹاف جنرل باجوہ سے بھی کہا ہے کہ وہ ان ممالک میں متعلقہ فوجی حکام سے رابطہ کر کے یہ واضح پیغام دیں کہ پاکستان قیام امن کے سلسلے میں اپنا کردار ادا کرنے کیلئے تیار ہے۔ لیکن، پاکستان اب کسی جنگ میں ملوث نہیں ہو گا۔‘‘
I have asked FM Qureshi to visit Iran, KSA & USA to meet with respective foreign ministers, Secretary of State; & COAS Gen Bajwa to contact relevant military leaders to convey a clear message: Pakistan is ready to play it%27s role for peace but it can never again be part of any war
— Imran Khan (@ImranKhanPTI) January 8, 2020
پاکستانی وزیر اعظم کا یہ پیغام امریکہ کی طرف سے ایران کے جنرل قاسم سلیمانی کو ڈرون حملے میں ہلاک کرنے اور ایران کی طرف سے عراق میں امریکہ کے دو فوجی اڈوں پر بیلسٹک میزائلوں کے حملے کے بعد آیا ہے۔ ان اقدامات سے خطے میں کشیدگی میں شدت سے اضافہ ہوا ہے اور لوگ اس بات کا انتظار کر رہے ہیں کہ ایرانی میزائل حملے کے بعد امریکہ کا رد عمل کیا ہو گا۔
پاکستان کے وزیر خارجہ شاہ محمود قریشی نے بھی بدھ کے روز میڈیا سے بات کرتے ہوئے کہا ہے کہ مشرق وسطیٰ میں جاری صورت حال کے تناظر میں بڑھتی ہوئی کشیدگی کسی کے مفاد میں نہیں ہے اور یہ خطہ جنگ کا متحمل نہیں ہو سکتا۔