امریکہ کے صدر ڈونلڈ ٹرمپ کے نامزد کردہ ڈائریکٹر نیشنل انٹیلی جنس نے درکار کوائف اور تجربے پر اٹھنے والے سوالات کے پیش نظر عہدے کے لیے اپنا نام واپس لے لیا۔
کانگریس کے رکن جان ریٹ کلف، جنہیں نیشنل انٹیلی جنس کے ڈائریکٹر کے طور پر نامزد کیا گیا تھا کے حوالے سے امریکہ کے صدر ڈونلڈ ٹرمپ نے ٹوئٹ میں کہا ہے کہ جان ریٹ کلف نے فیصلہ کیا ہے کہ وہ کانگریس کے رکن رہیں گے جہاں انہوں نے ٹیکساس کے عوام اور ہمارے ملک کے لیے نمایاں خدمات انجام دی ہیں۔
صدر ٹرمپ کا مزید کہنا تھا کہ وہ ڈائریکٹر نیشنل انٹیلی جنس کے لیے جلد ہی کسی اور کو نامزد کریں گے۔
....John has therefore decided to stay in Congress where he has done such an outstanding job representing the people of Texas, and our Country. I will be announcing my nomination for DNI shortly.
— Donald J. Trump (@realDonaldTrump) August 2, 2019
جمعے کے روز وائٹ ہاؤس میں اخباری نمائندوں سے بات کرتے ہوئے صدر ٹرمپ نے اس فیصلے کا ذمہ دار ذرائع ابلاغ میں ہونے والی بحث کو قرار دیا۔
ڈونلڈ ٹرمپ کا کہنا تھا کہ ذرائع ابلاغ نے ریٹ کلف کے ساتھ ناانصافی کی جبکہ نامزدگی کی توثیق کا عمل طویل تر ہوتا۔
Our great Republican Congressman John Ratcliffe is being treated very unfairly by the LameStream Media. Rather than going through months of slander and libel, I explained to John how miserable it would be for him and his family to deal with these people....
— Donald J. Trump (@realDonaldTrump) August 2, 2019
واضح رہے کہ ریٹ کلف کا یہ اعلان ایسے موقع پر سامنے آیا ہے جب صرف پانچ روز قبل ہی صدر نے انہیں ڈائریکٹر نیشنل انٹیلی جنس نامزد کیا تھا۔
ریٹ کلف ٹرمپ کے حامی جب کہ ایوان نمائندگان کی انٹیلی جنس کمیٹی کے جونیئر ترین رکن ہیں۔