خیبر پختونخوا کے شمالی ضلعے لوئر دیر میں صوبے میں حکمران جماعت پاکستان تحریکِ انصاف (پی ٹی آئی) کے رکن صوبائی اسمبلی ملک لیاقت کے قافلے پر حملے میں چار افراد کی ہلاکت کی تصدیق ہوئی ہے جب کہ رکنِ اسمبلی سمیت متعدد افراد زخمی بھی ہوئے ہیں۔
ضلعی پولیس کے ایک عہدیدار نے ذرائع ابلاغ کو بتایا کہ یہ واقعہ لوئر دیر کی تحصیل میدان میں ہفتے کی شام پیش آیا۔
حکام نے تصدیق کی کہ ہلاک ہونے والوں میں ملک لیاقت کے بھائی جہاں عالم اور بھتیجے یاسر کے علاوہ پولیس اہل کار نصیر اور لیوی اہل کار بادشاہ بھی شامل ہیں۔
بیان کے مطابق ملک لیاقت کے گاڑی پر نامعلوم حملہ آوروں نے فائرنگ کی۔
رکن اسمبلی ملک لیاقت کے کزن محمد ارشاد نے بتایا کہ فائرنگ کے واقعے میں ملک لیاقت شدید زخمی ہوئے ہیں۔ جنہیں ضلعی ہیڈ کوارٹر اسپتال(ڈی ایچ کیو) تیمرگرہ منتقل کیا گیا۔
بعد ازاں انہیں پشاور کے لیڈی ریڈنگ اسپتال منتقل کر دیا گیا جب کہ ایک زخمی بچے کو بھی پشاور منتقل کیا گیا ہے۔
محمد ارشاد کے مطابق دونوں زخمیوں کی حالت اب خطرے سے باہر ہے۔
ضلعی پولیس افسر کے دفتر نے رابطہ کرنے پر بتایا کہ پولیس کو کارروائی کے لیے متعلقہ علاقے میں روانہ کر دیا گیا ہے۔
کل رات ایم پی اے ملک لیاقت پر قاتلانہ حملہ انتہائی قابلِ مذمت ہے. ان کی جلد صحت یابی کے لئے دعا گو ہوں. جو سیکورٹی اہلکار شہید ہوا، اللہ اس کو جنت میں مقام عطا کرے اور ان کے اہل خانہ کو صبر جمیل عطا فرمائے
— Asad Umar (@Asad_Umar) August 7, 2022
وزیرِ اعلیٰ خیبر پختونخوا محمود خان نے ملک لیاقت اور ساتھیوں پر حملے کا نوٹس لیتے ہوئے پولیس حکام کو حملے میں ملوث عناصر کی فوری گرفتاری کے لیے ضروری اقدامات کی ہدایت کی ہے۔
وزیرِ اعلیٰ نے ملک لیاقت پر حملہ انتہائی قابل مذمت اقدام قرار دیتے ہوئے کہا کہ اس واقعے میں ملوث عناصر قانون کی گرفت سے کسی صورت بچ نہیں سکتے۔
انہوں نے کہا کہ فائرنگ میں ملوث عناصر کو جلد گرفتار کر کے قانون کے کٹہرے میں لایا جائے گا۔
Our colleague member of Khyber Pakhtunkhwa Assembly Malik Liaqat Ali Khan critically injured while four others lost their lives after unidentified men attacked him. May Allah give him health ameen . pic.twitter.com/mDIsNLsGt6
— Momina Basit (@MominaBasit1) August 6, 2022
دوسری طرف لیڈی ریڈنگ اسپتال کے ترجمان محمد عاصم کا کہنا ہے کہ واقعے میں زخمی ہونے والے رکن اسمبلی ملک لیاقت خان اس وقت زیرِ علاج ہیں۔
ترجمان کا کہنا تھا کہ ملک لیاقت کی حالت کے بارے کچھ کہنا قبل ازوقت ہے تاہم ان کے بقول اس وقت ان کا علاج جاری ہے اور امید کرتے ہیں کہ وہ جلد صحت یاب ہو جائیں گے۔
محمد عاصم کے مطابق ملک لیاقت کا آپریشن کیا گیا ہے اور انہیں وارڈمیں شفٹ کر دیا گیا ہے۔