پاکستان کے دفترِ خارجہ کا کہنا ہے کہ پاکستانی گلوکار فخر عالم کے روس کے ویزے کی تجدید کے بعد انہیں دنیا کے گرد اپنے فضائی سفر 'مشن پرواز' کو جاری رکھنے کی اجازت دے دی گئی ہے۔
فخر عالم کو پیر کو روس کے مشرقی شہر یوزونا سخالنسک کے ایئرپورٹ پر روسی ویزے کی میعاد ختم ہونے کی وجہ سے ان کی پرواز لینڈ ہونے کے بعد روسی حکام نے حراست میں لے لیا تھا۔
پاکستان کے دفتر خارجہ کے ترجمان محمد فیصل نے اپنے ٹوئٹر بیان میں کہا ہے کہ "اس بات کی تصدیق کی جاتی ہے کہ روسی حکام نے (منگل کی) صبح کو فخر عالم کو ویز ا جاری کر دیا ہے۔ ان کا جہاز پیر کو یوزنا سخالنسک کے ایئرپورٹ پر اترا تھا اور اس وقت ان کے روس کے ویزے کی میعاد ختم ہو چکی تھی۔"
Pleased to confirm that visa granted to Fakhar-e-Alam by authorities of Russian Federation today in the morning. His plane had landed at Yuzhno-Sakhalinsk city airport, located more than 6000 km from Moscow, in wee hours of 29 October 2018 after expiry of his Russian visa. 1/2
— Dr Mohammad Faisal (@DrMFaisal) October 30, 2018
Pak Ambassador, embassy officials remained in touch with Fakhar-e-Alam throughout his stay. We convey our profound gratitude to the Government of the Russian Federation, in particular the Ministry of Foreign Affairs, for their fullest cooperation #MissionParwaaz @mfa_russia 2/2
— Dr Mohammad Faisal (@DrMFaisal) October 30, 2018
ترجمان نے کہا ہے کہ اس دوران ماسکو میں پاکستان کے سفیر فخر عالم کے ساتھ رابطے میں رہے۔ ان کے بقول وہ روس کی حکومت اور خاص طور پر روس کی وزارتِ خارجہ کے تعاون کے شکر گزار ہیں۔
دوسری طرف فخر عالم نے اپنے ٹوئٹر بیان میں کہا ہے کہ انہیں روس کا ویزا مل گیا ہے اور اب وہ آگے کا سفر جاری رکھنے کی تیاری کر رہے ہیں۔
#MissionParwaaz update 11am local time. I have just received a new visa. I am now preparing the airplane and ready to go to Petropavovask airport. Thank you to all of my friends, well wishers the Pakistan government and the Russian authorities. The flag continues its journey.
— Fakhr-e-Alam (@falamb3) October 30, 2018
فخر عالم ایک پرائیویٹ جہاز پر دنیا کے گرد سفر پر نکلے ہیں۔ انہیں پیر کو جاپان سے روس کے مشرقی شہر یوزنا سخالنسک کے ایئرپورٹ پر لینڈ ہونے کے بعد اس وقت حراست میں لے لیا گیا تھا جب ان کے روسی ویزے کی مدت ختم ہوئے دو گھنٹے ہو گئے تھے۔
فخر عالم نے 10 اکتوبر کو 'مشن ۔ پرواز' کےنام سے اپنے عالمی فضائی سفر کا آغاز امریکہ سے کیا تھا اور انہوں نے 28 دنوں پر محیط سفر کا اختتام بھی امریکی ریاست فلوریڈا میں کرنے کا پروگرام بنا رکھا ہے۔