جو اعزازات واپس لیے گئے ہیں ان میں 'ٹور ڈی فرانس' کے سات ٹائٹل بھی شامل ہیں جو انہوں نے 1999ء سے 2005ء کے دوران میں جیتے تھے
بین الاقوامی سائیکلنگ کے منتظم ادارے نے عالمی شہرت یافتہ امریکی سائیکلسٹ لانس آرمسٹرانگ سے تمام اعزازات واپس لینے کا اعلان کرتے ہوئے اُن پر تاحیات پابندی عائد کردی ہے۔
آرمسٹرانگ سے جو اعزازات واپس لیے گئے ہیں ان میں 'ٹور ڈی فرانس' کے سات ٹائٹل بھی شامل ہیں جو انہوں نے 1999ء سے 2005ء کے دوران میں جیتے تھے۔
'انٹرنیشنل سائیکلنگ یونین' نے پیر کو اپنے ایک اعلامیہ میں کہا ہے کہ یونین نے امریکہ کی اینٹی ڈوپنگ ایجنسی 'یوساڈا' کی جانب سے اگست میں جاری کی گئی اس رپورٹ کو درست تسلیم کرلیا ہے جس میں آرمسٹرانگ پر کارکردگی بڑھانے والی ادویات کے استعمال کا الزام عائد کیا گیا تھا۔
Photo Gallery:
لانس آرمز اسٹرانگ
سنہ 2000میں جب لانس آرمز اسٹرانگ نے امریکہ میں منعقد ہونے والی ’ٹور ڈی فرانس‘ کی ریس جیتی، وہ دنیائے سائیکلنگ کے افق پر ایک مانا ہوا نام بن چکے تھے۔ اکتوبر 2012ء میں اُنھوں نے ’لائیو اسٹرانگ کینسر چیرٹی‘ کی سربراہی سے استعفیٰ دیا یہ کہتے ہوئے کہ وہ اپنے اوپر لگنے والے الزامات اور ساتوں اعزازات واپس لیے جانے کے اعلان کو چیلنج نہیں کریں گے۔
'یوساڈا' نے ایک ہزار صفحات پر مشتمل اپنی اس رپورٹ میں 41 سالہ ریٹائرڈ سائیکلسٹ کے خلاف کی جانے والی تحقیقات کا نتائج پیش کیے تھے۔ رپورٹ میں آرمسٹرانگ کے خلاف کئی دستاویزی شواہد اور ان کے 11 سابق ساتھیوں کے بیاناتِ حلفی بھی شامل تھے۔
آرمسٹرانگ کئی برسوں سے خود پر عائد کیے جانے والے ان الزامات کی تردید کرتے آرہے تھے اور ان کا موقف تھا کہ اپنے کیریئر کا دوران ان پر کبھی ممنوعہ ادویات کے استعمال کا الزام میڈیکل ٹیسٹ میں ثابت نہیں کیا جاسکا۔
مذکورہ رپورٹ سامنے آنے کے بعد کئی معروف اشتہاری کمپنیوں نے ریٹائرڈ سائیکلسٹ کے ساتھ کیے گئے اپنے معاہدے منسوخ کردیے ہیں جب کہ انہیں خود اپنی ہی قائم کردہ فلاحی تنظیم 'لو اسٹرونگ' کی سربراہی سے مستعفی ہونا پڑا ہے۔
