- By محمد ثاقب
سندھ حکومت کا 250 ڈسپوزبل وینٹی لیٹرز خریدنے کا فیصلہ
سندھ حکومت نے کرونا وائرس کی صورت حال سے نمٹنے کے لیے 250 ڈسپوزبل وینٹی لیٹرز خریدنے کا فیصلہ کیا ہے۔
جن میں سے 50 ڈسپوزبل وینٹی لیٹرز صوبائی حکومت کو مل چکے ہیں جب کہ صوبائی محکمہ صحت نے مزید 163 وینٹی لیٹرز خریدنے کا بھی فیصلہ کیا ہے۔
محکمہ صحت کے مطابق سندھ میں 13 کرونا ٹیسٹنگ لیبارٹریز ہیں جہاں یومیہ 4800 کرونا ٹیسٹ کرنے کی صلاحیت موجود ہے جب کہ اس صلاحیت کو مزید بڑھایا جا رہا ہے۔
وزیر اعلیٰ سندھ کے مشیر بیرسٹر مرتضیٰ وہاب نے کہا ہے کہ صوبے کے سرکاری اسپتالوں میں 283 وینٹی لیٹرز موجود ہیں۔ اس وقت 14مریض وینٹی لیٹرز پر ہیں۔
صوبائی حکومت کے ترجمان بیرسٹر مرتضٰی وہاب کا کہنا ہے کہ سندھ میں اب تک 64 ہزار افراد کی ایئرپورٹ پر اسکریننگ کی جاچکی ہے۔
وزیر اعلیٰ ہاوس سے جاری تفصیلات کے مطابق کرونا وائرس کے 307 نئے کیسز میں سے 237 کا تعلق کراچی سے ہے جب کہ خیرپور میں 21، کشمور کندھ کوٹ میں 12، لاڑکانہ میں 8، حیدرآباد میں 5، سکھر میں 3 ، بدین ، سانگھڑ اور شہید بینظیر آباد میں ایک ایک نیا کیس سامنے آیا ہے۔
پاکستان میں اموات 500، مریض 22 ہزار سے زیادہ
پاکستان میں 24 گھنٹوں کے دوران کرونا وائرس کے مزید 548 مریضوں کی تصدیق ہوئی ہے جبکہ اس میں مبتلا 28 افراد دم توڑ گئے ہیں۔ اس طرح اموات کی تعداد 514 تک پہنچ گئی ہے۔ اب تک ملک بھر میں 2 لاکھ 22 ہزار سے زیادہ ٹیسٹ کیے جاچکے ہیں جن میں 22049 مثبت آئے ہیں۔
خیبرپختونخوا میں مریضوں کی تعداد سندھ اور پنجاب سے کم ہے لیکن وہاں سب سے زیادہ یعنی 194 اموات ہوچکی ہیں۔ سندھ میں 148 اور پنجاب میں 144 مریضوں کا انتقال ہوا ہے۔ بلوچستان میں یہ تعداد 21، اسلام آباد میں 4 اور گلگت بلتستان میں 3 ہے۔ آزاد کشمیر میں کسی کا انتقال نہیں ہوا۔
اب تک ملک میں 5801 مریض صحت یاب ہوچکے ہیں۔ ان میں پنجاب کے 2716، سندھ کے 1629، خیبرپختونخوا کے 875، گلگت بلتستان کے 279، بلوچستان کے 197، اسلام آباد میں 56 اور آزاد کشمیر کے 49 شہری شامل ہیں۔
اسپینش فلو اور کرونا وائرس: ایک صدی میں کیا بدلا، کیا نہیں بدلا؟
سائنس کے شعبے میں ایک صدی کی غیر معمولی ترقی کے باوجود 2020 میں بہت کچھ ویسا ہے، جیسا 1918 میں تھا۔
اسپینش فلو اور کووڈ 19 کے درمیانی عرصے میں دنیا کو وائرسوں کے بارے میں علم ہوا، کئی بیماریوں کا علاج دریافت ہوا، موثر ویکسینیں بنائی گئیں۔ معلومات کی تیز ترین ترسیل ممکن ہوئی اور صحت عامہ کے شاندار نظام قائم کے گئے۔
اس کے باوجود انسان وہیں کھڑا ہے۔ منہ پر ماسک لگائے۔ اور متعدی مرض کی روک تھام سے پہلے لاکھوں کو مرتا دیکھتے ہوئے۔
1918 کی طرح عوام اپنے رہنماؤں کے کھوکھلے وعدے سن رہے ہیں جبکہ اسپتال اور مردہ خانے بھرتے جا رہے ہیں اور بینک اکاؤنٹس خالی ہو رہے ہیں۔ قرنطینہ کا قدیم زمانہ واپس آگیا ہے اور اس کے ساتھ عطائیوں کے مشورے بھی۔