رسائی کے لنکس

logo-print

دنیا بھر میں جمہوریت خطرے میں ہے، میموریل ڈے پر صدر بائیڈن کا خطاب


صدر بائیڈن آرلنگٹن کے قومی قبرستان میں یادگار پر پھولوں کی چادر چڑھا رہے ہیں۔ 31 مئی 2021

امریکہ کے صدر جوبائیڈن نے سابق فوجیوں کی یاد میں منائے جانے والے دن کی تقریب کے موقع پر اپنے خطاب میں کہا کہ خود امریکہ کے اندر اور دنیا بھر میں ہر جگہ جمہوریت خطرے میں ہے۔

صدر بائیڈن نے ان خیالات کا اظہار نائب صدر کاملا ہیرس اور اعلیٰ فوجی عہدے داروں کے ہمراہ امریکی دارالحکومت واشنگٹن ڈی سی کے نزدیک آرلنگٹن میں واقع فوجی قبرستان میں یادگار پر پھول چڑھانے کے بعد اپنے خطاب میں کیا۔

انہوں نے کہا کہ ہم اب کیا کرتے ہیں اور کس طرح اپنی جانیں گنوانے والوں کو یاد رکھتے ہیں، اس سے یہ پتا چلے گا کہ جمہوریت قائم رہے گی یا نہیں۔

بائیڈن ڈھکے چھپے انداز میں بظاہر اس سال 6 جنوری کو ان لوگوں کی جانب سے کیپیٹل ہل کے محاصرے کی طرف اشارہ کر رہے تھے، جو سابق صد ڈونلڈ ٹرمپ کے حق میں، نومبر کے انتخابات میں صدر بائیڈن کی جیت کی توثیق روکنے کے لیے آئے تھے۔

صدر بائیڈن میموریل ڈے کی تقریب سے خطاب کر رہے ہیں۔ 31 مئی 2021
صدر بائیڈن میموریل ڈے کی تقریب سے خطاب کر رہے ہیں۔ 31 مئی 2021

اپنے 22 منٹ کے اس خطاب میں صدر بائیڈن نے میڈیا سے کہا کہ وہ سچ کو تلاش کریں، اس سچ کو جس کی بنیاد حقائق پر ہو نہ کہ پراپیگنڈے پر۔

سنہ 1868 کی خانہ جنگی کے دوران مئی کے اواخر میں امریکہ میں 'میموریل ڈے' کا اجرا ہوا تھا، جس کا مقصد جنگوں میں جان دینے والے امریکی فوجیوں کو خراجِ عقیدت پیش کرنا تھا۔

یہ دن اب ہر سال مئی کے آخری پیر کو منایا جاتا ہے۔ اس روز امریکہ میں عام تعطیل ہوتی ہے۔

صدر بائیڈن اور امریکی خاتون اول میموریل ڈے کے موقع پر آرلنگٹن کے قومی قبرستان میں حاضری دے رہے ہیں۔ 31 مئی 2021
صدر بائیڈن اور امریکی خاتون اول میموریل ڈے کے موقع پر آرلنگٹن کے قومی قبرستان میں حاضری دے رہے ہیں۔ 31 مئی 2021

قومی تعطیل کے اس دن واشنگٹن ڈی سی سے کچھ دور واقع آرلنگٹن نیشنل سیمٹری کی طرح ملک کے دیگر فوجی قبرستانوں میں قبروں کے سرہانے قومی پرچم رکھے جاتے ہیں، جہاں ملک کے لیے جانیں دینے والے مدفون ہیں۔

اس سے ایک روز قبل صدر بائیڈن نے ڈیلاویئر میں ایک گھر کے سامنے اکٹھے ہونے والے سابق فوجیوں اور ان کے خاندانوں سے خطاب کیا۔

ان کا کہنا تھا کہ ہمیں یہ یاد رکھنا چاہیے کہ ہم نے آزادیوں کی کیا قیمت ادا کی ہے۔ ہمیں یہ بھی یاد رکھنا چاہیے کہ یہ قیمت ادا کرنے والوں کا ہم پر کیا قرض ہے اور ہمیں ان خاندانوں کو بھی یاد رکھنا چاہیے جو وہ اپنے پیچھے چھوڑ گئے ہیں۔

امریکہ میں میموریل ڈے وطن کی خاطر جنگوں میں اپنی جانیں قربان کرنے والوں کی یاد میں منایا جاتا ہے۔

میموریل ڈے اور رولنگ تھنڈر
please wait

No media source currently available

0:00 0:00:39 0:00

اس دن کو امریکہ میں روایتی طور پر موسم گرما کے باقاعدہ آغاز کے طور پر بھی دیکھا جاتا ہے۔ جس کے بعد امریکہ بھر میں روایتی طور پر سفر اور تفریح کے موسم کا باقاعدہ آغاز ہو جاتا ہے۔

امریکہ کے محکمہ ٹرانسپوٹ کے مطابق گزشتہ سال میموریل ڈے پر کرونا وائرس کی وجہ سے زیادہ لوگوں نے سفر نہیں کیا لیکن اس سال لانگ ویک اینڈ پر جمعرات اور جمعے کے روز 18 لاکھ افراد نے ملک بھر میں ہوائی جہازوں کے ذریعے سفر کیا۔

فیس بک فورم

XS
SM
MD
LG