آسٽريلوي ٽيسٽ ٽيم جو ڪپتان پيٽ ڪمنز ڀارت خلاف جاري ٽيسٽ سيريز جي دوران ئي وطن لاءِ روانو ٿي ويو آهي.
آسٽريلوي ڪرڪيٽ بورڊ سومر تي هڪ ٽوئيٽ ۾ چيو ته پيٽ ڪمنز کي پنهنجي گهرواريءَ جي شديد بيماريءَ سبب ڀارت کان سڊني اچڻو پيو.
جيتوڻيڪ ڪرڪيٽ بورڊ واضح ناهي ڪيو ته سندس گھر ڀاتين مان ڪير بيمارآهي ۽ بيماري جي نوعيت ڪهڙي آهي.
آسٽريلوي بورڊ پاران امڪان ظاھر ڪيو ويو آھي ته ڪمنز جلد ئي ڀارت موٽندو ۽ ٽيسٽ سيريز جي باقي ميچن ۾ ٽيم جي اڳواڻي ڪندو.
پيٽ ڪمنز ڀارت خلاف ٻئي ٽيسٽ ميچ جي ٻئي اننگز ۾ بالنگ نه ڪري سگهيو هو ۽ ميچ جي فيصلي کانپوءِ فوري طور گهر روانو ٿي ويو.
دهليءَ ۾ کيڏيل ٻئي ميچ جو فيصلو ٽئين ڏينهن جي راند جي پڄاڻيءَ تي ٿيو. ڀارت 115 رنسن جو هدف آسانيءَ سان 4 وڪيٽن جي نقصان تي حاصل ڪري چئن ميچن جي سيريز ۾ 0-2 جي برتري ماڻي ورتي.
ٻنهي ٽيمن وچ ۾ سيريز جو ٽيون ميچ مارچ جي پهرين تاريخ کان ڀارتي شهر اندور ۾ شروع ٿيندو، جنهن لاءِ رانديگرن کي 10 ڏينهن انتظار ڪرڻو پوندو.
