منگل کے روز پاکستانی دفتر خارجہ سے جاری ہونے والے بیان کے مطابق رہائی پانے والے 17 قیدیوں کو بدھ کے روز واہگہ بارڈرکے راستے وطن واپس بھیجا جائے گا تاہم بیان میں قیدیوں کے حوالے سے مزید تفصیلات بیان نہیں کی گئیں۔
قیدیوں کی رہائی کا اقدام ایک ایسے وقت پر سامنے آیا ہے جب رواں ہفتے اسلام آبا د میں بھارت سمیت دوسرے سارک ممالک کے وزراء داخلہ کا اجلاس شروع ہو رہا ہے جب کہ اسی مہینے دونوں ملکوں کے خارجہ سیکرٹریوں کی سطح پر دو طرفہ بات چیت بھی ہو گی۔
پاکستان اور بھارت کے درمیان ایک عدالتی کمیٹی موجود ہے جو ایک دوسرے کی جیلوں میں موجود قیدیوں کو سفارتی رسائی فراہم کرنے اور ان قیدیوں کی رہائی کے حوالے سے کام کرتی ہے جو اپنی سزائیں پوری کر چکے ہیں اور جن کی شہریت کا تعین کیا جا چکاہو۔
دونوں ملکوں کے ریٹائرڈ ججوں پر مشتمل یہ کمیٹی پاکستان اور بھارت کے درمیان 2004ء میں شروع ہونے والے اس امن عمل کے تحت قائم ہوئی تھی جو نومبر 2008ء کے ممبئی حملوں کے بعد معطل ہوا۔
پاکستانی حکام دونوں ملکوں کے درمیان رابطوں کی بحالی کو خوش آئند امر اور دو طرفہ اعتماد قائم کرنے کے حوالے سے اہم قرار دے رہے ہیں۔
