رسائی کے لنکس

logo-print

میکسیکو: ڈرگ سمگلر کا بیٹا پکڑنے پر شہر میدان جنگ بن گیا، مجبوراً چھوڑنا پڑا


مسلح افراد نے ڈرگ سمگلر کا بیٹا رہا کرانے کے لیے گاڑیوں کو آگ لگا دی۔ 18 اکتوبر 2019

میکسیکو کی ایک ریاست سینالوا میں اس وقت بڑے پیمانے پر مسلح افراد اور پولیس کے درمیان لڑائی چھڑ گئی جب انہوں نے جیل میں قید منشیات کے ایک ڈان، ہوکین گزمن کے بیٹے کو پکڑا۔ لڑائی بند کرانے کے لیے پولیس کو ڈان کے بیٹے کو چھوڑنا پڑا۔

سیکیورٹی امور کے وزیر الفانزو ڈرازو نے ایک بیان میں کہا ہے کہ کولیاکان میں جمعرات کی سہ پہر پولیس اہل کار اپنی معمول کی گشت پر تھے کہ ایک مکان کے اندر سے ان پر فائرنگ کی گئی۔ پولیس نے جوابی کارروائی کرتے ہوئے مکان کو گھیرے میں لے لیا اور اندر داخل ہو کر وہاں موجود چار افراد کو گرفتار کر لیا۔

پکڑے جانے والوں میں منشیات کے ایک بے تاج بادشاہ گوزمان کا بیٹا بھی شامل تھا، جس نے اپنے والد کی گرفتاری کے بعد 2017 میں جیل کاٹنے کے لیے امریکہ منتقلی کے بعد جزوی طور پر اس کا کاروبار سنبھالا ہوا ہے۔

پولیس کی اس کارروائی کے بعد گینگ کے مسلح افراد نے گھر کو محاصرے میں لے کر پولیس اہل کاروں کو محبوس کر دیا۔ اور پھر شہر کے مختلف حصوں میں بڑے پیمانے پر فائرنگ شروع کر دی، جس سے پورے علاقے میں خوف و ہراس پھیل گیا۔

مسلح افراد نے کئی گاڑیوں کو آگ لگا دی اور لوگوں کو اپنی جانیں بچانے کے لیے محفوظ مقامات پر چھپنے پر مجبور کر دیا۔

شہر بھر میں فائرنگ اور آتش زدگی سے لوگوں میں خوف و ہراس پھیل گیا۔ 18 اکتوبر 2019
شہر بھر میں فائرنگ اور آتش زدگی سے لوگوں میں خوف و ہراس پھیل گیا۔ 18 اکتوبر 2019

اس دوران حکومت کی طرف سے شہریوں کو یہ ہدایات جاری کی گئیں کہ وہ اپنے گھروں میں رہیں اور اگر وہ گھر سے باہر ہیں تو گولیوں کی زد میں آنے سے بچنے کے لیے کسی محفوظ مقام پر پناہ لے لیں۔

سیکورٹی امور کے وزیر نے اپنے بیان میں کہا ہے کہ کولیاکان کے شہریوں کی جان و مال کے تحفظ اور امن و امان قائم کرنے کے لیے حکومت نے منشیات گینگ کے خلاف کارروائی معطل کر کے ڈان کے بیٹے کو رہا کر دیا ہے۔

خبر رساں ادارے، اے ایف پی کی رپورٹ میں بتایا گیا ہے کہ مسلح افراد کی فائرنگ سے ساڑھے سات لاکھ آبادی کے شہر کولیاکان میں اس قدر دہشت پھیلی کہ لوگ اپنی گاڑیاں سڑکوں پر چھوڑ کر بھاگ کھڑے ہوئے، جس سے شاہراہوں پر آمد و رفت معطل ہو گئی۔

خبروں میں بتایا گیا ہے کہ فائرنگ کے ان واقعات میں متعدد پولیس اہلکار زخمی بھی ہوئے۔

منشیات کے ڈان گورزمان، جسے ’ایل چاپو‘ کے نام سے جانا جاتا ہے، مختلف اوقات میں سینکڑوں ٹن کوکین، ہیروئن اور دوسری منشیات کی امریکہ میں اسمگلنگ کے جرم میں عمر قید کی سزا کاٹ رہا ہے۔ لیکن، اس کا گروپ بدستور میکسیکو میں منشیات کے غیر قانونی کاروبار کا سب سے طاقت ور گروپ ہے۔ اور اس کے بیٹے کاروبار کی نگرانی کر رہے ہیں۔

مسلح افراد فائرنگ کرتے دکھائی دے رہے ہیں۔ 18 اکتوبر 2019
مسلح افراد فائرنگ کرتے دکھائی دے رہے ہیں۔ 18 اکتوبر 2019

گورزمان کو جیل توڑ کر بھاگنے کے بعد 2016 میں دوبارہ گرفتار کیا گیا تھا۔ انہیں کولمبیا کے پابلو ایسکوبار کے بعد منشیات کا سب سے طاقت ور ڈان سمجھا جاتا ہے۔ پابلو 1993 میں ایک پولیس مقابلے میں ہلاک ہو گیا تھا۔

میکسیکو کی مختلف ریاستوں میں منشیات کے گینگ مختلف وجوہات کی بنا پر آپس میں لڑتے رہتے ہیں۔ پچھلے ہفتے ان کے درمیان دو مسلح جھڑپوں میں 28 افراد ہلاک ہو گئے تھے۔

میکسیکو کی حکومت نے 2006 میں منشیات کے بڑے بڑے گروپس کے خاتمے کے لیے فوج تعینات کی تھی۔ ان لڑائیوں میں ڈھائی لاکھ سے زیادہ افراد کی ہلاکتوں کی تصدیق ہو چکی ہے۔

فیس بک فورم

XS
SM
MD
LG