رسائی کے لنکس

logo-print

صومالیہ میں سرکاری فورسز کا باغیوں کے مزید ٹھکانوں پر قبضہ


صومالیہ میں سرکاری فورسز کا باغیوں کے مزید ٹھکانوں پر قبضہ

صومالیہ میں حکومت نواز فورسز کا کہناہے کہ انہوں نے دارالحکومت میں اسلامی شورش پسند گروپ الشباب کے مزید کچھ ٹھکانوں پر قبضہ کرلیا ہے۔

موگادیشو کے شہریوں کا کہناہے کہ انہوں نے جمعے کے روز بڑے پیمانے پر گولہ باری کی آوازیں سنیں۔ سرکاری اور افریقی یونین کے فوجیوں نے اس ہفتے کے شروع سے عسکریت پسندوں کے خلاف کارروائی کرتے ہوئے ان پر دباؤ میں اضافہ کردیاہے۔

فوجی عہدے داروں کا کہناہے کہ ان کی فورسز نے جھڑپوں کے بعد جمعے کے روز موگادیشو کے ہولوادنگ اور واردھیگلی اضلاع پر قبضہ کرلیا۔

الشباب کا موگادیشو کے زیادہ تر حصے پر کنٹرول ہے اور جنوبی اور وسطیٰ صومالیہ کا ایک بڑا حصہ گذشتہ کئی برسوں سے ان کے قبضے میں ہے۔

لیکن اب افریقی یونین کی حمایت یافتہ سرکاری فوج کو زمینی کامیابیاں حاصل ہورہی ہیں۔ بدھ کے روز حکومت نے کہا تھا کہ اس کے فوجی دستوں نے موگادیشو میں الشباب سے تین اہم مقامات چھین لیے تھے جن میں وزارت دفاع کی سابقہ عمارت بھی شامل تھی۔

الشباب نے حکومتی دعوؤں کی نفی کی ہے۔

XS
SM
MD
LG