مصر کے حکام نے بتایا ہے کہ بدھ کے روز طے پانے والے تصفیے کے نتیجے میں اس سال کے اوائل میں تقریباً ایک ہفتے تک سوئز کینال میں پھنسے رہنے والے سمندری جہاز کو بحیرہ روم کے لیے روانہ ہونے کی اجازت دے دی گئی ہے۔
بڑے حجم کا مال بردار سمندری جہاز 'ایور گیون' Ever Given کینال کی گریٹ بٹِر لیک سے روانہ ہو چکا ہے، جہاں اسے مالی تنازع کے بعد تین ماہ سے زیادہ عرصے تک روک دیا گیا تھا۔
سمندری جہاز کے مالک جاپانی ادارے، 'شوئی کسین کائشا لمیٹڈ' اور کینال کے حکام کے مابین تصفیہ ہوا، جس کے لیے کئی ہفتوں تک بات چیت اور تعطل کا سلسلہ جاری رہا۔
حکام نے تصفیے کی تفصیل نہیں بتائی۔ سوئز کینال اتھارٹی نے ابتدائی طور پر 90 کروڑ 60 لاکھ ڈالر کا معاوضہ طلب کیا تھا، جسے بعدازاں گھٹا کر 55 کروڑ ڈالر کر دیا گیا تھا۔ مقامی اطلاعات کے مطابق، رقم کے معاوضے کے علاوہ کینال کو ایک ٹگ بوٹ بھی دی جائے گی۔
بتایا گیا ہے کہ گفت و شنید کے بعد ایک باضابطہ سمجھوتے پر بدھ کو سوئز کینال کے شہر اسماعیلیہ میں دستخط ہوئے، جس کے بعد سمندری جہاز بحیرہ روم کے لیے روانہ ہو گیا۔
اپنی ایک رپورٹ میں ٹگ بوٹ میں موجود خبر رساں ادارے، ایسو سی ایٹڈ پریس کے نمائندے نے لنگرانداز جہاز کو بحیرہ روم روانہ ہونے کی منظر کشی کی ہے، جس سے قبل اسماعیلیہ میں سوئز کینال کے اہلکاروں اور بھاری سمندری جہاز کے مالک کی جانب سے سمجھوتے پر دستخط کیے جانے کے تقریب دکھائی گئی ہے۔
شوئی کسین کائشا لمیٹڈ نے بتایا ہے کہ بحیرہ روم میں واقع مصر کے شہر، بندر سعید میں جہاز کی تفصیلی جانچ پڑتال کی جائے گی، جس کے بعد اسے اگلے پورٹ روانہ ہونے کی اجازت دی جائے گی، جہاں جہاز پر لدا ہوا سامان اتارا جائے گا۔
بدھ کو ہونے والی اس پیش رفت سے ایک روز قبل جہاز کے مالک اور انشورنس کمپنی اور سوئز کینال اتھارٹی کی جانب سے طے پانے والے سمجھوتے کے پیش نظر مصر کی عدالت نے جہاز پر عائد پابندی ہٹانے کے احکامات جاری کیے تھے۔
کینال کے حکام کے مطابق، معاوضے سے ملنے والی یہ رقم سمندری جہاز کو کینال سے ہٹانے کے کام پر ہونے والے اخراجات، کینال میں تعطل کا شکار جہاز رانی پر اٹھنے والی لاگت، اور چھ روز تک 'ایور گیون' کے پھنسے رہنے کے نتیجے میں پیدا ہونے والی دیگر مشکلات کے عوض بطور معاوضہ لی گئی ہے۔
پاناما کا پرچم بردار یہ جہاز 23 مارچ کو ڈنمارک کی پورٹ روٹرڈم کے لیے رواں تھا، جب یہ چھ روز تک سوئز شہر کے قریب کینال میں داخلے کے جنوبی مقام سے تقریباً چھ کلومیٹر (تین اعشاریہ 7 میل) دور نہر میں پھنسا رہا، جس کے نتیجے میں کینال کی آمد و رفت بُری طرح سے متاثر ہوئی۔
