پاکستان ٹی وی کی سینئر اداکارہ روبینہ اشرف بھی کرونا وائرس کا شکار ہو گئی ہیں اور وہ کراچی کے ایک نجی اسپتال میں زیرِ علاج ہیں۔
اداکارہ کے اہل خانہ اور ساتھی فن کاروں نے ان کی صحت کے لیے دعا کی اپیل کی ہے۔
ساٹھ سالہ روبینہ اشرف کرونا وائرس کے شبہے میں پچھلے کچھ دنوں سے آئسولیشن میں تھیں اور ان کا کرونا ٹیسٹ مثبت آیا تھا۔
پاکستان ٹی وی ڈراموں سے وابستہ شخصیات روبینہ اشرف کی جلد صحت یابی کے لیے دعا گو ہیں۔
ماہرہ خان، ہمایوں سعید، محمد احمد، ثنا جاوید، اعجاز اسلم اور شگفتہ اعجاز سمیت متعدد شخصیات نے سوشل میڈیا پر روبینہ اشرف سے اظہار ہمدردی کرتے ہوئے ان کی صحت کے لیے دعا کی ہے۔
سماجی رابطے کی ویب سائٹ ٹوئٹر پر اداکار ہمایوں سعید نے ان کے تمام پرستاروں اور دیگر افراد سے روبینہ اشرف کی جلد صحت یابی کے لیے نیک خواہشات کا اظہار کرتے ہوئے ان سے دعا کی درخواست کی ہے۔
Please pray for Rubina Ashraf. May Allah grant her good health and quick recovery pic.twitter.com/CK5jdkSvze
— Humayun Saeed (@iamhumayunsaeed) June 7, 2020
اداکار اعجاز اسلم نے بھی اس حوالے سے ایک ٹوئٹ کی ہے جس میں انہوں نے عوام اور پرستاروں سے روبینہ اشرف کی جلد صحت یابی کے لیے دعا کی اپیل ہے۔
Please pray for her speedy recovery #RubinaAshraf #CoronaVirusPakistan #Covid_19 #gocoronago pic.twitter.com/WR4XIays8S
— aijaz aslam (@aijazz7) June 7, 2020
روبینہ اشرف اداکارہ ہونے کے ساتھ ساتھ ایک پیشہ ور گرافک ڈیزائنر بھی ہیں۔ وہ گرافک ڈیزائنز میں گریجویٹ ہیں۔
فنی کیریئر میں انہیں سائرہ کاظمی کے ڈرامے ساون روپ سے شہرت ملی تھی حالانکہ یہ ان کا پہلا نہیں، دوسرا ڈرامہ تھا۔
روبینہ اشرف کو سب سے زیادہ شہرت ڈرامہ 'پسِ آئینہ' میں لیڈی پولیس انسپکٹر کے کردار سے ملی۔ اس سیریل کے بعد اُن کا نام ایک کے بعد ایک ڈرامے سے جڑتا چلا گیا۔
انہوں نے ڈراموں کے علاوہ 2016 میں ریلیز ہونے والی فلم 'لاہور سے آگے' میں بھی اداکاری کی۔ یہ فلم 2015 میں ریلیز ہونے والی مزاحیہ فلم 'کراچی سے لاہور' کا سیکول تھی۔
گزشتہ برس ہی روبینہ اشرف نے ڈرامہ سیریل 'سرخ چاندنی' سے بطور ڈرامہ ڈائریکٹر ڈیبیو کیا تھا جس کی کہانی تیزاب گردی کا شکار ہونے والی ایک عورت کے گرد گھومتی ہے۔
واضح رہے کہ پاکستانی اداکاروں کے کرونا وائرس ٹیسٹ مثبت آنے کا یہ واقعہ نہیں ہے بلکہ روبینہ اشرف سے پہلے ایک اور سینئر اداکارہ سکینہ سموں کے بھی وبائی مرض میں گھرجانے کی اطلاعات تھیں۔
دوسری جانب حالیہ عرصے کے دوران ہی اداکار اور پروڈیوسر ڈائریکٹر یاسر نواز، ان کی اہلیہ ندا یاسر، علیزے شاہ، نوید رضا کے بارے میں بھی یہی اطلاعات موصول ہوئیں تھیں کہ ان کا کرونا وائرس ٹیسٹ مثبت آیا ہے۔
پاکستان کے علاوہ کئی بالی وڈ فن کاروں میں بھی کرونا وائرس پھیلنے کی اطلاعات سامنے آ چکی ہیں۔ ادھر ہالی وڈ میں بھی کئی فن کار کرونا کا شکار ہو چکے ہیں۔