رسائی کے لنکس

ایران میں کرونا وائرس کے پھیلاؤ میں تیزی، ہلاکتیں 54 ہو گئیں


تہران میں گھر سے باہر نکلنے والی زیادہ تر خواتیں کرونا وائرس سے بچنے کے لیے ماسک استعمال کر رہی ہیں۔ 29 فروری 2020
تہران میں گھر سے باہر نکلنے والی زیادہ تر خواتیں کرونا وائرس سے بچنے کے لیے ماسک استعمال کر رہی ہیں۔ 29 فروری 2020

ایران کی وزارتِ صحت نے اتوار کے روز بتایا ہے کہ کرونا وائرس سے نئی ہلاکتوں کے بعد ملک میں اس وبا کے نتیجے میں اب تک 54 افراد اپنی جانوں سے ہاتھ دھو چکے ہیں جب کہ تصدیق شدہ مریضوں کی تعداد 978 تک پہنچ گئی ہے۔

وزارتِ صحت کے ترجمان کیانوش جہان پور نے کہا ہے کہ نئے مریضوں کی تصدیق کئی شہروں میں ہوئی ہے جن میں مشہد بھی شامل ہے جہاں ایران کے انتہائی اہم مقبرے موجود ہیں جن کی زیارت کے لیے دنیا بھر سے شیعہ زائرین بڑی تعداد میں آتے ہیں۔

حکومت نے مقبروں کے منتظمین کو یہ مشورہ دیا تھا کہ وہ کچھ عرصے کے لیے اُنہیں زائرین کے لیے بند کر دیں، لیکن اس پر عمل نہیں کیا گیا۔

نئے اعداد و شمار کے مطابق ہفتے کو کرونا وائرس سے مزید 11 افراد ہلاک ہوئے اور 385 نئے مریضوں میں اس مرض کی شناخت ہوئی۔

ایران میں لوگ وائرس سے بچنے کے لیے ہر جگہ ماسک پہن رہے ہیں۔ 29 فروری 2020
ایران میں لوگ وائرس سے بچنے کے لیے ہر جگہ ماسک پہن رہے ہیں۔ 29 فروری 2020

ماہرین کا کہنا ہے کہ ایران میں کرونا وائرس سے ہلاکتوں کی شرح ساڑھے پانچ فی صد ہے جو دوسرے ملکوں کے مقابلے میں بہت زیادہ ہے۔ جس سے یہ ظاہر ہوتا ہے کہ اس وائرس میں مبتلا مریضوں کی اصل تعداد اس سے کہیں زیادہ ہے۔

جہان پور نے اپنی بریفگ میں بتایا کہ ایران بھر میں کرونا وائرس کے مریضوں کی تعداد میں اضافے کا رجحان برقرار ہے۔

نئے تصدیق شدہ 385 مریضوں میں سے 170 کا تعلق تہران سے ہے جہاں مسلسل دو ہفتوں سے تعلیمی ادارے بند ہیں۔ اگرچہ بس اور میٹرو چل رہی ہے لیکن ان میں روزانہ جراثیم کش ادویات کا چھڑکاؤ کیا جا رہا ہے۔ اسی طرح مصروف گلیوں اور شاہراؤں پر بھی جراثیم کش ادویات چھڑکی جا رہی ہیں۔

تہران میں حفاظتی کارکن ایک بس میں جراثیم کش ادویات کا چھڑکاؤ کر رہا ہے۔ 25 فروری 2020
تہران میں حفاظتی کارکن ایک بس میں جراثیم کش ادویات کا چھڑکاؤ کر رہا ہے۔ 25 فروری 2020

صحت کے حکام نے بتایا ہے کہ پہلی بار مرکزی صوبے میں بھی 44 مریضوں کی نشاندہی ہوئی ہے۔

عہدے داروں نے حٖفاظتی اقدامات کے پیش نظر شمالی صوبے گیلان کے صدر مقام رشد جانے اور آنے والی تمام پروزیں معطل کر دی ہیں۔ تہران اور قم کے بعد کرونا وائرس کے سب سے زیادہ مریض صوبہ گیلان کے علاقوں سے رپورٹ ہوئے ہیں۔

ایران میں کرونا وائرس کا پہلا کیس 19 فروری کو سامنے آیا تھا۔ یہ وہ تاریخ تھی جب اس وبا سے دو معمر افراد کی ہلاکت ہوئی۔ اس کے بعد سے اب تک کویت، بحرین، عمان، متحدہ عرب امارات، قطر، لبنان، افغانستان اور پاکستان میں کرونا وائرس کے 1100 سے زیادہ مریضوں کی تصدیق ہو چکی ہے جن کی اکثریت ایران کا دورہ کر کے واپس اپنے ملکوں میں گئی تھی۔

XS
SM
MD
LG