بھارتی کرکٹرز یوراج سنگھ اور ہر بھجن سنگھ کو کرونا وائرس سے نمٹنے کے لیے پاکستان کرکٹ ٹیم کے سابق کپتان شاہد آفریدی کی حمایت مہنگی پڑ گئی ہے۔ اُنہیں سوشل میڈیا صارفین کی جانب سے شدید نتقید کا سامنا ہے اور اُنہیں آڑے ہاتھوں لینے والوں کا ایک طوفان سا امڈ آیا ہے۔
فرانسیسی خبر رساں ادارے 'اے ایف پی ' کے مطابق یوراج سنگھ اور ہر بھجن سنگھ نے حال ہی میں پاکستان میں کرونا وائرس سے متاثرہ افراد کی مدد کے لیے 'شاہد آفریدی فاؤنڈیشن' کی حمایت کے ساتھ ساتھ چندہ دینے کی اپیل کی تھی۔
ہربھجن سنگھ نے اپنے پیغام میں کہا تھا کہ دنیا انتہائی مشکل وقت سے گزر رہی ہے۔ ہمیں شاہد آفریدی فاؤنڈیشن کی مدد کے لیے اپنا کردار ادا کرنا چاہیے جو بہت اچھا کام کر رہی ہے۔
یاد رہے کہ سابق پاکستانی کرکٹر شاہد آفریدی ایک فلاحی تنظیم 'شاہد آفریدی فاؤنڈیشن' کے بانی ہیں۔
The world is passing through extremely testing and unprecedented times.Let’s do our bit to help @SAfridiOfficial @SAFoundationN doing gr8 work plz join hands with them nd contribute what ever u can https://t.co/t9OvfEPp79 for covid19 @wasimakramlive @YUVSTRONG12 @shoaib100mph pic.twitter.com/sB2fxCAQqY
— Harbhajan Turbanator (@harbhajan_singh) March 29, 2020
ہربھجن سنگھ نے اپنے ویڈیو پیغام میں عوام اور دیگر کرکٹرز سے شاہد آفریدی فاؤنڈیشن کی مدد کے لیے اپنا حصہ ڈالنے کی اپیل کی تھی۔
دوسری جانب یوراج سنگھ نے اپنے ٹوئٹر پیغام میں لکھا تھا کہ یہ ایک دوسرے کی آزمائش اور مدد کرنے کا وقت ہے۔
Thank you for all you support-both yourself & my brother @harbhajan_singh are huge pillars of support; this bond we have shows love & peace transgresses borders when it comes to humanity especially. Best wishes to you with your noble endeavours with @YOUWECAN #DonateKaroNa https://t.co/IVhqywdl3q
— Shahid Afridi (@SAfridiOfficial) March 31, 2020
اس پر شاہد آفریدی نے دونوں کرکٹرز کا شکریہ ادا کیا لیکن بھارتی ٹوئٹر صارفین نے اپنے کرکٹرز کی اس حمایت پر شدید ناراضگی اور غصے کا اظہار کیا ہے۔
ایک صارف نے کہا کہ ہربھجن اور یوراج میرے دل میں جو آپ دونوں کے لیے احترام تھا وہ اب ختم ہو گیا ہے۔
These are testing times, it’s time to lookout for each other specially the ones who are lesser fortunate. Lets do our bit, I am supporting @SAfridiOfficial & @SAFoundationN in this noble initiative of covid19. Pls donate on https://t.co/yHtpolQbMx #StayHome @harbhajan_singh pic.twitter.com/HfKPABZ6Wh
— yuvraj singh (@YUVSTRONG12) March 31, 2020
یوراج نے اس ٹوئٹ کے جواب میں لکھا کہ ضرورت مندوں کی حمایت کا پیغام دوسروں پر گراں کیوں گزرنے لگتا ہے۔ میں نے اس پیغام کے ذریعے یہ کوشش کی تھی کہ دونوں ممالک کی عوام کی صحت کا خیال رکھنا چاہیے، اس لیے ان کی مدد کی جائے۔
یوراج سنگھ کا یہ بھی کہنا تھا کہ میرا ارادہ کسی کے جذبات کو ٹھیس پہنچانا نہیں تھا۔ میں ایک ہندوستانی ہوں اور ہمیشہ انسانیت کی مدد کے لیے کھڑا رہوں گا۔
یوراج سنگھ نے اپنی 'یو وی کین فاؤنڈیشن کے ذریعے کرونا وائرس سے نمٹنے کے لیے فنڈز بھی اکھٹا کیا ہے۔
کرونا وائرس کی وبا سے پھیلی تباہی کے باوجود بھارتی ٹوئٹر صارفین دونوں ملکوں کے درمیان کشیدہ تعلقات کو بالائے طاق رکھنے پر آمادہ نہیں ہیں۔
کچھ صارفین کا مؤقف تو اس قدر سخت ہے کہ ہربجھن کی حمایت پر انہوں نے پوری سکھ برادری کو 'غدار' قرار دیا ہے۔
ادھر شاہد آفریدی نے سوشل میڈیا پر ہربھجن اور یوراج کو تنقید کا نشانہ بنانے والوں کے رویے پر افسوس کا اظہار کیا ہے۔
یاد رہے کہ بھارت میں کرونا وائرس سے اب تک 38 افراد ہلاک ہو چکے ہیں جب کہ ملک بھر میں کرونا وائرس کے متاثرین کی تعداد 1600 تک جاپہنچی ہے۔
بھارت اور پاکستان کے درمیان 2013 کے بعد سے کوئی کرکٹ سیریز نہیں ہوئی ہے۔ دونوں ملکوں کے درمیان کشمیر کے موضوع پر سالوں سے کشیدگی چلی آ رہی ہے اور دونوں ممالک کے درمیان دو مرتبہ جنگ بھی ہو چکی ہے۔
بھارت اور پاکستان کرکٹ کے میدان میں بھی روایتی حریف ہیں۔ دونوں ٹیموں کے درمیان جب بھی میچ ہوتا ہے تو گراؤنڈ کے اندر اور ٹی وی پر ایک جنگ کا سماں ہوتا ہے۔