روشن مغل
پاکستان کے زیر انتظام کشمیر میں حکام نے بتایا ہے کہ جمعے کے روز جنگ بندی لائن پار سے بھارتی فوج کی گولہ باری سے ایک خاتون سمیت دو افراد ہلاک اور پانچ زخمی ہو گئے ۔
پاکستانی کشمیر کے جنوبی ضلع راولاکوٹ کے ڈپٹی کمشنر طاہر ممتاز نے وائس آف امریکہ کو بتایا کہ جمعہ کی صبح عباس پور سیکٹر کے سرحدی قصبے تروٹی کے ایک گھر پر مارٹر گولہ گرنے سے ایک پچپن سالہ خاتون شديد زخمی ہو گئی جس کا اسپتال منتقلی کے دوران انتقال ہو گیا۔
اسی گاؤں میں ایک اور مکان کے گولہ باری کی زد میں آنے سے ایک شہری زخمی ہو گیا، اور کئی دکانوں اور ایک گاڑی کو بھی نقصان پہنچا۔
کنٹرول لائن کی دوسری جانب سے آنے والے گولے ضلع حویلی کے سرحدی گاؤں کیرنی پر بھی گرے جس سے ایک شہری ہلاک ہو گیا
حویلی کے ایس پی پولیس راشد نقوی نے وائس آف امریکہ کو بتایا کہ گھروں پر گولہ گرنے سے چار خواتین زخمی بھی ہوئیں۔
حکام کا کہناہے کہ دو روز قبل بھی عباس پور سیکٹر کے سرحدی دیہات ککوٹہ میں ایک75 سالہ خاتون سرحد پار سے بھارتی فائرنگ کا نشانہ بن کر ہلاک ہو گئی تھی۔
